Føremål med reguleringa og skildring av planforslaget
Formålet med reguleringa er å legge til rette for utbetring og omlegging av rv.5 i Florø, frå Fugleskjersgata i vest, Markegata og til Evja i aust. Frå Skudalsbakken i aust vert riksvegen lagt om og skal følgje den delen av Markegata som i dag er kommunal veg.
Reguleringsplanen konkretiserer tidlegare forprosjekt frå Statens vegvesen om utbetring av rv. 5 Markegata. I samsvar med forprosjektet til Statens vegvesen vert vegsystemet utforma slik at det gjev best mogeleg trafikktryggleik for alle trafikkantar, dette inkluderer god framkomst for mjuke trafikkantar. Det oppgraderte vegsystemet vert utforma i tråd med krava i vegnormalane, samstundes som det vert teke omsyn til bystrukturen og kvalitetane i planområdet.
Overordna arealplan og konsekvensutgreiing
Planforslaget er i tråd med overordna kommunedelplan for Florø sentrum av 02.10.2018 (KDP), der arealet er sett av til vegformål, med bandlegging for regulering etter plan- og bygningslova (PBL).
I føresegnene til kommunedelplan går det fram at området er bandlagd med tanke på ny trasé for rv. 5 gjennom Markegata, der det ikkje tillate med tiltak i bandleggingssona som kan vere til hinder for slik vegløysing. Det framgår også av KDP at ny/oppgradert trase for rv. 5 skal gå gjennom Markegata i heile si lengde.
Planarbeidet vart oppstartsvarsla som detaljregulering, i samsvar med overordna kommunedelplan der vegplan-tiltaka vart konsekvensutgreidd, inkludert alternativvurdering for traseval. Gjennom planprosessen har det vist seg at detaljreguleringa ikkje ville vere tilstrekkeleg avklarande for å kunne byggast etter for sidearealet til vegen, og planforma vart derfor endra til områderegulering.
Premiss for ein vegplan, vil i særs stor grad vere styrt av krav i veghandbøkene, og planarbeidet som er gjort har vore i tett samarbeid med vegvesenet. Basert på dette har kommunen konkludert at prosjektet ikkje fell under oppfangskriteria i forskrift om konsekvensutgreiing.
Offentleg høyring og frist for innspel
Planframlegget er tilgjengeleg for gjennomsyn i tidsrommet 15.05. - 30.06.2025.
Eventuelle merknader/innspel kan sendast til kommunen på elektronisk høyringsskjema. Du kan også sende merknader/innspel i post til Kinn kommune, Postboks 294, 6701 Måløy, eller via epost til post@kinn.kommune.no, seinast 30.06.2025.
Planframlegget med relevante dokument kan sjåast ved å klikke på vedlegga under.
Lovheimel
Plan- og bygningslova §5-2, §12-10.
Vedlegg til kunngjeringa