Ungdommens kommunestyre i Kinn (UKK) har 15 representantar valt frå dei fem skulane (ungdomsskular og vidaregåande skular). Ungdom som er eller blir 13 til 19 år i valåret, og som er busette i kommunen, kan veljast. Hybelbuarar kan også veljast. Valet blir gjennomført annakvart år, og er same året som det vert gjennomført kommunestyre- og fylkestingsval, eller og stortingsval. Ungdommens kommunstyre i Kinn tilsvarer ungdomsråd i andre kommunar.

Medlemmane i UKK finn du her

UKK har ca. seks møte i året. Møteplanen vil bli lagt opp til lite møteaktivitet i eksamensperioden og i desember. Møta i UKK er både fysiske og digitale. Å delta i Ungdommens kommunestyre skal vere både lærerikt og sosialt. I tillegg til å bli godt kjent med dei andre representantane i eigen kommune, blir ein kvar haust invitert til samling for alle ungdomsråda i Nordfjord.

I det politiske reglementet for Kinn kommune står det at Ungdommens kommunestyre skal samarbeide for å sikre brei, open og tilgjengeleg medverknad for ungdom i Kinn kommune.

Ungdommens kommunestyre skal ha ei aktiv og sjølvstendig rolle der dei:

1. arbeider for ungdom sine interesser og taler deira sak i kommunen
2. stimulerer til samfunnsengasjement, medverknad og deltaking blant ungdom
3. byggjer bruer mellom ungdomen og det politiske miljøet
4. er eit rådgjevande organ i saker som vedkjem barn og ungdom
5. er eit debattforum for ungdom

Deltaking i ungdommens kommunestyre skal gi opplæring i demokratisk arbeid og påverknad, og slik gje representantane høve til å påverke både eigne og andre unge sine levekår.

I tillegg til å behandle saker som angår barn og unge, blir det arrangert ulike temadagar og verkstader der ungdommane får kome med innspel om ulike tema som berører ungdom.

Representantar for ungdommens kommunestyre har møte- og talerett i alle politiske organ som handsamar saker som gjeld ungdom. I «vaksen-kommunestyret» i Kinn kommune stiller ungdomsordførar og ungdomsvaraordførar i dei fleste møta.

Ungdommens kommunestyre vel utsendingar til Ungdommens fylkesting, som blir arrangert av fylkeskommunen ein til to gongar i året.