Samfunnsplanen har fokus på at vi saman skal gjere Kinn til ein endå meir attraktiv kommune. Utfordringa med fleire eldre, færre i arbeidsfør alder og færre barn og unge gjer at omstilling og tiltak for å motverke denne utviklinga er noko vi må fokusere på.

Vi er ein ressursrik kommune og planen vår seier noko om korleis vi tenkjer kring realisering og forvaltning av desse ressursane. Spørjeundersøkinga vi sender ut handlar om samfunnsplanen til kommunen for perioden 2024-2036, som er på høyring ut september. For å lese meir om samfunnsplanen kan du sjå heimesida til samfunnsplanen, som vi har laga (lenke).

Vi håpar du vil svare på spørsmåla - lenke i SMS er trygg

Vi håpar du kan ta deg tid til å svare på spørsmåla. Vi sender ut SMS til om lag 4000 av innbyggarane våre torsdag 5. september, med ei vennleg påminning neste veke. 

Avsendaren er «Kinn Komm» og i SMS'en er det ein invitasjon til å delta i ei spørjeundersøking, med ei lenke til å delta i undersøkinga digitalt, på formatet «https://svar.sentio.no/answer?key=» med 12 tilfeldige teikn bak «=». 

Alle som vert invitert får ei personleg lenke for å delta, slik at ein veit at berre innbyggarar i Kinn kommune skal kunne delta. Dette er kvifor lenka inneheld 12 tilfeldige teikn på slutten. Lenka er trygg å trykke på og sendast ut av Sentio Research på vegner av kommunen. Dei som deltar i undersøkinga haldast anonym overfor kommunen.

Rekruttering til innbyggarpanel på same tid

Undersøkinga vert også brukt til å rekruttere folk til eit innbyggarpanel som skal drøfte samfunnsplanen vidare. For å sikre at dei som deltek i dette panelet representerer breidda i kommunen vår, vil dei som deltek her vere tilfeldig trekt blant innbyggarane. 

Sentio Research står for gjennomføringa av dette prosjektet og vil sikre ei god fordeling av folk etter alder, kjønn, bustadområde, og andre relevante faktorar.

Resultata frå undersøkinga og innbyggarane si evaluering vert publisert på kommunens nettside til slutten av oktober.