Den førre samfunnsplanen til Kinn blei lagt ut på høyring i midten av april 2018. Den gang fekk vi fire innspel frå offentlege organisasjonar, og ein frå Ungdomsrådet i Vågsøy. Det er veldig positivt at engasjementet for å involvere seg i samfunnsplanen har auka så betydeleg sidan sist.

Havvind, skjergard og arealnøytralitet

Eit av dei mest omtalte tema i innspela er havvindutbygging og nedbygging av skjergarden i Florø. Heile 21 av innspela har fokus på dette, der mange av dei har lik tittel og utforming. Dette viser at mange innbyggarar er koordinerte og opptatt av korleis havvindprosjekt kan påverke det lokale miljøet, naturen og dei maritime verdiane rundt skjergarden vår.

Innspela uttrykker bekymring for utbygging av havvind og nedbygging av skjergarden, og at tolegrensa for nedbygging er nådd. Dei meiner også at arealstrategien ikkje legg opp til reell arealnøytralitet og dei ønskjer klarare målsettingar for å redusere naturtap og sikrare vern av nærnaturen.

Vidare kjem det kritikk mot at havvind er spesielt nemnd i samfunnsplanen. Dersom ei næring er nemnd spesifikt, må også andre potensielle næringar inkluderast for å sikre ein rettferdig og balansert plan.

Skulestruktur er også i fokus

Om lag seks av innspela handlar om Raudeberg skule, og spesielt debatten kring framtida til skulen. I tillegg har ein innbyggar oppretta ei sak via MinSak.no, som eit innbyggarinitiativ for å bevare skulen. Innbyggarinitiativet og dei andre innspela skal vurderast saman med den vidare handsaminga av samfunnsplanen og temaplanen for oppvekst. Innbyggarinitiativet har oppnådd meir enn 300 signaturar, som gjer at kommunestyret er pliktige til å handsame saka. Sjølv om initiativet tilfredsstiller krava for politisk handsaming, er det ikkje ein garanti for at saka får medhald.

Til liks med Raudeberg skule, har det også kome innspel og motsegn mot å legge ned Krokane skule. Det vert uttrykt bekymring for at ein stor del av elevane skal overførast til Florø barneskole med for store klassar og overfylte klasserom, og at ei nedlegging vil føre til negative konsekvensar for busetting og Krokane som bydel.

Uro kring sentralisering og nedprioritering av distrikta

Fleire av innspela peikar på at høyringsutkastet til samfunnsplanen tenderer mot sentralisering og nedbygging av distrikta. Eitt av innspela tar føre seg at det blir omtalt mykje om «10-minutts byen», og at ambisjonar for bygdene ikkje får nok omtale i planen. Det vert også nemnd at ein manglar ein følelse av fellesskap, og at mangel på felles møteplassar kan vere ein av årsakene til dette. Nokon peikar også på ein tydelegare omtale av kva tenester ein kan vente å få i distrikta, medan planen fokuserer i stor grad på bysentra.

På same tid meiner 9 av 10 i innbyggarundersøkinga som blei gjennomført i starten av september at vi må utvikle byane våre, og legge til rette for felles møteplassar og skape grunnlaget for meir aktivitet i bysentra.

Variert bakgrunn for innspela

Av dei 63 innspela er 38 sendt inn av privatpersonar. Dei resterande kjem frå ei rekkje ulike aktørar som; foreldreutval, frivillige lag og organisasjonar, og offentlege og private verksemder. Blant desse finn vi Fagforbundet, Rognaldvåg landhandel, FAU Raudeberg skule, Statens vegvesen og Vestland fylkeskommune. Dette breie spekteret av innspel gjer at mange ulike perspektiv og interesser blir teke med i vurderinga av samfunnsdelen.

Handsaming av innspela

Innspela vert no gjennomgått som ein del av det førebuande administrative arbeidet før saka vert meldt opp til handsaming i kommunestyret. Alle innspela, inkludert dei som kom etter fristen, blir vurderte nøye. Spørsmåla knytt til havvindutbygging og skulestruktur elles, er viktige for veldig mange i lokalsamfunnet, og vil få mykje merksemd i den vidare prosessen.

Rapportar frå innbyggarpanel i Florø og Måløy

Sentio Research har gjennomført samlingar med innbyggarpanel i Florø og Måløy. Her kan du lese rapportane frå desse to møta.

• Rapport frå innbyggarpanel i Florø (PDF, 264 kB)
• Rapport frå innbyggarpanel i Måløy (PDF, 249 kB)

Du kan lese innspela her

Nedanfor kan du lese alle innkomne innspel til høyringa av samfunnsplanen.