Til besøket har Statsforvaltaren utarbeidd eit kommunebilde for Kinn – eit digitalt støtte- og styringsverktøy som visualiserer nøkkeltal og fakta etter ein ROS-modell, både for kommunen som heilskap og for dei ulike tenesteområda. Kommunebildet er utvikla i samarbeid mellom Kommunal- og distriktsdepartementet, Statsforvaltarens fellestenester og statsforvaltarane.

Kommunebildet er grunnlaget for kva tema partane går nærare inn på under møtet. Kinn kommune stiller med formannskapet, gruppeleiarane og kommuneleiargruppa, medan Statsforvaltaren møter med statsforvaltaren sjølv og alle avdelingsdirektørane.

Etter kommunebesøket blir kommunebildet og ei skriftleg tilbakemelding gjort offentleg på nettsida til Statsforvaltaren. Statsforvaltaren har til no gjennomført tilsvarande besøk i 13 kommunar i Vestland. Kommunebilda for alle desse ligg tilgjengelege under «Kommunal styring / kommunedialog med kommunebilde» på heimesida deira.