Eitt samla lag for betre oppfølging 

Kinn kommune skal samle fagpersonar på tvers av dei kommunale tenestene psykisk helse og rus, helsestasjon, barnevern og KURS KF, for å tilby eit enklare og meir tilgjengeleg hjelpeapparat.  

Ressursteamet skal vere eit lågterskeltilbod som gir rask og presis hjelp til barn og unge med til dømes milde til moderate psykiske vanskar, i tillegg til foreldrerettleiing.  Med ei tverrfagleg verktøykasse av fagfolk skal vi sikre at rett hjelp blir gitt til rett tid – til dei som treng det mest. 

"Ei dør inn" til hjelpa 

Vi ønskjer å fjerne silotenking og sikre betre samarbeid mellom tenestene våre. Ressursteamet skal fungere som éin felles inngang til ulike hjelpetilbod, slik at brukarane slepp å navigere i eit oppdelt system. 

Den tverrfaglege gruppa vil kunne trekke inn andre fagpersonar etter behov for å sikre heilskapleg vurdering og tiltak. 

Mykje skal vere på plass til mai månad 

Prosjektleiaren har ansvar for å sikre ei god organisering av teamet, med fokus på effektiv ressursutnytting og kvalitet i tenestene. Prosjektgruppa skal innan mai 2025 legge fram forslag til namn, arbeidsform og struktur for teamet. 

Evaluering og vidare utvikling 

For å sikre kvalitet og framgang skal prosjektleiar rapportere kvartalsvis til kommunalsjef for helse og oppvekst, og stabsleiar for strategi og samordning. 

Med dette initiativet tar vi ansvar for å jobbe saman, og sikre rett tiltak til dei barn, unge og familiane som treng det mest. Arbeidet er forankra i Kinn kommune sine temaplanar for oppvekst og helse og velferd. Nasjonal rettleiar for psykisk helsearbeid for barn og unge som kom i oktober 2023 legg føringar for arbeidet.