Budsjett, økonomiplan og handlingsprogram 2025-2028

Formannskapet behandla saka den 26. november. Då vart kommunedirektøren sitt framlegg til budsjett, økonomiplan og handlingsprogram vedtatt mot fem røyster (2 FRP, 1 Venstre, 1 Raudt, 1 SP). I tillegg kom det inn eit tilleggspunkt lagt fram av Ola Teigen (AP) som vart samrøystes vedteke av formannskapet. Teigen sitt tilleggspunkt ber kommunedirektøren utgreie korleis ein kan etablere eit kulturfond i Kinn, som i neste runde kan utløyse regionale og nasjonale løyvingar.

Temaplan for oppvekst 2022-2034

Saka har vore behandla i oppvekst- og kulturutvalet (OK-utvalet) og sist i formannskapet. Formannskapet fatta eit anna vedtak enn OK-utvalet, og saka går no vidare til kommunestyret med formannskapet sitt vedtak.

Godkjenning av delavtale om svangerskaps-, fødsels- og barselomsorga mellom Helse Førde og Kinn kommune

Delavtalen har som føremål å avklare og konkretisere oppgåve- og ansvarsfordelinga mellom kommunen og Helse Førde. Avtalen skal bidra til eit heilskapleg tenestetilbod og gode rutinar for samarbeid og samhandling mellom kommunen og spesialisthelsetenesta rundt den einskilde pasient. Partane skal planlegge sine tenester saman for å sikre medverknad og overgangane mellom spesialist- og kommunehelsetenesta for pasientane.

Nye forskrifter for byggesak, oppmåling, plan og frikjøp av parkeringsplassar

Tidlegare i haust var desse forskriftene på offentleg høyring utan at det kom inn merknadar. Forskriftene er såleis uendra, og vert lagt fram for kommunestyret til handsaming med framlegg om at dei vert vedtatt.

Du kan lese forskriftene i denne lenka – dei ligg som vedlegg til saksdokumentet. 

Interpellasjon om formidling av kystkultur

Ninja Ness (AP) viser i interpellasjonen til ei orientering gitt i sist fylkeskulturutvalsmøte om nytt magasin i Angedalen (Førde) for Musea i Sogn og Fjordane. Det nye magasinet skal syte for at musea har kapasitet til å ta i vare på gjenstandane sine, og det er meint at magasinet skal nyttast til oppbevaring av båt og kunst. Ness legg fram at prosjektkostnaden for magasinet samla er om lag 106 millionar kroner, og viser til søknad om midlar til bygging.

Direktesending og fullstendig sakliste