Nye eigarar førar til nye endringar

Vossabedrifta Friskus har teke over ansvaret for innbyggarappen Civis. I samband med dette vil appen få nytt namn, «Friskus kommune», frå og med 26. mai 2025. 

– Me gjer ein lokal omvending og byter ut latin med vossamål. Ein «friskus» er ein sprek og uredd person med mykje frisk energi og det er akkurat slik me ønskjer å jobba vidare med appen, fortel dagleg leiar i Friskus, Sigrid Nedkvitne.

Ho understrekar at appen vil fungera akkurat som før. - Me ønskjer at appen skal halde fram med å vere staden for enkel tilgang på nødvendig informasjon «rett i lomma», uavhengig av bakgrunn og alder. Det vil ikkje endrast, avsluttar Nedkvitne.

Kva betyr dette for deg?

• Det er ikkje endring i funksjonalitet
  Alle funksjonar og tenester vil vere på same stad som du vanlegvis finn dei.
• Appen får ny logo og fargar
  Appen vil få ny logo og nye fargar som representerer endringa.
• Du må oppdatere appen
  Etter 26. mai må du oppdatera appen til den nyaste versjonen for at endringa skal trå i kraft.

Slik oppdaterer du appen

1. Opna App Store eller Google Play
2. Søk etter Friskus.
3. Trykk på Oppdater for å installera siste versjon.

Friskus - aktivitetskalender og innbyggarapp i eitt

Kinn kommune brukar både Friskus sin aktivitetskalender og innbyggarapplikasjon. Desse to tinga fungerer utruleg godt i lag, og om du lastar ned innbyggarappen får du rask tilgang til kommunen sine digitale tenester, nyhende og sjølvsagt aktivitetskalenderen som viser deg kva som skjer i kommunen.  Vi har berre fått positive tilbakemeldingar frå innbyggarar som brukar begge delar. Vi oppmodar om å laste ned Friskus kommune, og bruke aktivitetskalenderen flittig!