Offisiell avduking av nytt skilt på Florø Hamn
Ein stolt ordførar har i dag avduka det nye skiltet på Florø Hamn som vil vere ein veivisar for pilegrimar og turistar, og som markerer det fantastiske arbeidet som er lagt ned for å fremje Kystpilegrimsleia her i Kinn.
-Dette er eit av våre fremste kulturminne langs kysten, og er heilt sentrale delar av kulturhistoria vår, seier ordførar Bengt Solheim-Olsen.
To nøkkelstader i ruta ligg i Kinn
Ruta omfattar 25 nøkkelstader der 2 av dei ligg i Kinn. Svanøy hovudgard og Kinn kyrkje, samt Gulatinget, Kvernsteinsparken i Hyllestad og Selja kloster ligg nært til oss. Desse stadene er viktige stoppestader for pilegrimar på veg til Trondheim.
Frå Kinn til Trondheim
Til alle tider har pilegrimar reist langs kysten. Kystpilegrimsleia blei offisielt godkjend som St. Olavsveg i 2017. Ruta startar i Egersund og endar ved Nidarosdomen i Trondheim, med Florø strategisk plassert midt i smørauget med tilgang til nøkkelstader som Svanøy hovudgard og Kinn kyrkje.
Eit breitt tverrfagleg samarbeid
Arbeidet med Kystpilegrimsleia er forankra i fire pilarar: kyrkje, kultur, næring og miljø. Dette er eit samarbeid mellom kommunar, fylkeskommunar, kyrkjelydar, reiselivs- og næringsaktørar, frivillige organisasjonar, grunneigarar og kulturinstitusjonar i regionen. Lokalt i Kinn er det oppretta ei ressursgruppe leia av Knut Magne Nesse, med deltaking frå tur- og historielag, samt representantar frå reiseliv, kultur og kyrkje.