Les framlegget til handlingsprogram og økonomiplan 2026-2029 her

Ressursrik kommune

Kinn kommune har eit godt utgangspunkt for å møte framtida, trass generelt større press på kommuneøkonomien enn tidlegare. Tilsette, leiarar og tillitsvalde bidreg til god kvalitet og viser tilpassingsevne til vanskelege prioriteringar. Vi har vedtak på planverk som gjev oss strategiar og retning. 

Prosessen kring kommuneplanen sin arealdel er på høyring og vedtak i 2026 kan gi oss balanse mellom utbygging og vern av natur. Som viktig næringskommune er vi prisgitt nasjonale og internasjonale rammevilkår. Usikkerheit om framtidige godkjenningar til å drive havbruk, reduserte fiskerikvotar, mogeleg fall i oljeproduksjon med påfølgjande effektivisering og tilnærma stopp i «grøne investeringar» gjer at vi bør ha eit meir realistiske framtidsbilde enn for kort tid sidan. Likevel må vi ha eit langsiktig utviklingsperspektiv.

Folketalsveksten flatar ut

Vi har lagt bak oss fleire år med god folketalsutvikling, særleg knytt til busetting og integrering. Det er grunn til å tru at folketalsutviklinga flatar ut med utgangspunkt i m.a. færre oppgåver innan flyktningfeltet. Vi må også forvente større mobilitet hos innbyggjarane, då vi også ser at fleire vaksne har endra flyttemønster enn tidlegare.   

Modige val

Kommuneplanen sin samfunnsdel, vart vedteke i oktober 2025 og fokuserer på tenesteutvikling, økonomiske bereevne, demografi og arealstrategi. Skal vi lukkast med å halde oppe eit levande lokalsamfunn, må vi vere opne for endring, rause i møte med nye innbyggarar, modige i val og kloke i planlegging. Samarbeid og samskaping om arbeidskraft og utvikling av tenester blir avgjerande i omstillingsarbeid og kunne tiltrekke oss etableringar og lokke til oss innbyggjarar.   

Høg fondsbruk i dag, reservar er brukt opp når vi treng dei. Auka press på driftsøkonomi

Tertialrapportane i 2025 viste mindre meirforbruk enn tidlegare. Mogeleg underdekning er 10 mill. kr. og skuldast nokre få urealistisk føresetnader. Driftsbudsjettet er likevel basert på bruk av fond for å få balanse. Vi har redusert fondet frå 77 mill. kr. i 2022 til 38 mill. kr. (prognose) i 2025. Økonomiplan viser at vi mot slutten av økonomiplanperioden og må gjennomføre omstillingstiltak. 

Det vanskelege ligg føre oss

Dei vanskelegaste oppgåvene i omstillingsprogrammet ligg føre oss, m.a. med omsyn til tilpassing av tenestetilbodet til aukande eldre befolkning. Vi har slitasje i høve stort omfang av omstilling og vi må vere aktive for å ivareta tilsette i ei tid med mange endringar. 

Gjennom arbeidet i finansutvalet denne hausten, og arbeid med omstillingsprogrammet, har vi vist kor vanskeleg det er å komme ned på eit nivå som oppnår økonomisk balanse og kunne ta ut den effekt vi kan oppnå sett mot korleis andre kommunar driv. Ut i økonomiplan har vi ikkje tilfredsstillande økonomiske resultat og manglande dispisjonsfond kjem til å gjer denne jobben tøffare.         

Store byggjeprosjekt

Bygging av Skram skole er starta, og det ligg ikkje føre avvik på framdrift eller budsjett. Gate 1 prosjektet er snart ferdig utan større endringar under gjennomføring. Anbod for Albertatunet har vert ute i marknaden. Vi har ikkje motteke klage og kontrakten på første byggetrinn ligg innanfor budsjettet. Brannstasjon i Måløy er teken i bruk. Innan nyttår tek vi sikte på å lyse etter entreprenør for brannstasjon i Florø. Vi startar investeringsprosjekt på Florø barneskole.

Knappe areal til bedriftene sine utviklingsplanar 

Utkast til kommuneplanen sin arealdel er forsinka, men er planlagt vedtatt i 2026. Mange innbyggjarar og bedrifter ventar på avklaring. Vi er inne i ei positiv utvikling med bedrifter som ynskjer å utvikle seg hos oss, men desse interessene må vegast i høve andre interesser. 

Store inntekter frå havbruk, vatn og vind – stor risiko for reduksjon i inntekter 

Kinn kommune er ein kommune med store inntekter frå naturressursar. Som kommune har vi tilrettelagt for bruk av sjø- og landareal til næring, kraft og oppdrett. Vi har rettmessig krav på inntekter som kompensasjon for å stille areal til disposisjon. 

Inntektene, særleg frå havbruk, er usikre. Stortinget fatta ikkje endeleg vedtak i samband med handsaming av havbruksmeldinga, men føringar for vidare arbeid gjev grunn risiko og usikkerheit om framtidig storleik. Det blir peika på at auke i eigedomsskatt kan bli naudsynt som kompensasjon om redusert inntekt blir utfall av ny havbrukspolitikk. Slik sett har vi omsynteke risiko for endring i nasjonalpolitikk, og vi har då heller ikkje gjort framlegg om auke i eigedomsskatt. Dette har også vore drøfta med finansutvalet i haust.