Les årsrapport for 2024 her
Bufferfond på 44 mill. kr.
Ved utgangen av 2024 har Kinn eit bufferfond på 44,7 millionar kroner mot 47,8 i 2023. I 2024 fekk vi meirinntekter frå havbruksfondet på 5 mill. kr. Regjeringa la inn ekstra inntekter på slutten av 2024, etter vi hadde handsama 2. tertialrapport. Kinn kommune fekk her styrka frie inntekter med 13,4 mill. kr. Fondet utgjer 2%, mot mål på 8% som kommunestyret har sett.
Innstramming i 2024 for å unngå meirforbruk
Den økonomiske situasjonen er betre enn rapportert i 2. tertialrapport 2024. Det kjem av lågare forbruk og mindre utgifter til tenestene enn prognostisert. Tenesteområda var bede om å stramme inn drifta ved 1. halvår 2024, då vi låg an til eit stort meirforbruk. Meirforbruket enda til slutt på 6,2 mill. kr. Dette er eit driftsavvik på 0,3%. Leiarar, tilsette og tillitsvalde har jobba godt for å oppnå dette resultatet.
Framleis område med manglande samsvar mellom budsjett og rekneskap
Vi har framleis område med manglande samsvar mellom budsjett og faktisk driftsutgiftsnivå. Dette må vi jobbe med i 2025. Sjølv om vi hadde eit lite avvik samla sett, er det område vi må forbetre oss på. Vi hadde i 2024 også utfordringar med å nå budsjettmåla for formålsbygg. Ressurssituasjonen til formålsbygg må vi sjå nærmare på i 2025. Utgiftene til helsetenestene er stigande, sjølv om ein dei siste åra har halde budsjettrammene er dette også eit område vi må gå gjennom. Ressurssituasjonen for grunnskule er også utfordrande.
Auka lånegjeld – auke i rente- avdragsbetalingar på 150 mill. kr. til 2028
Vi budsjetter med ei stor auke i lånegjelda. Ved utgangen av 2024 hadde vi 3,3 mrd. i lånegjeld. I perioden fram til 2027 skal vi fullføre investeringar i Albertatunet, Skram skole, brannstasjon og Gate 1 i Måløy. Frå 2022 til 2028 kjem vi nesten til å doble rente- og avdragskostnadane.
Nødvendig å spare for å kunne dekke renter og avdrag
Det vedtekne investeringsprogrammet for 2025-2028 og drifsutfordringar krev innsparingstiltak på til saman 150 millionar kroner. Vi skal omstille oss i forhold til demografiutviklinga. Vi får færre inntekter på grunn av færre barn og vi må auke innsatsen til helse- og velferd som følgje av fleire oppgåver og auka tal eldre i befolkninga. Dette er særs krevjande og representerer ein stor risiko. Etter kommunedirektøren si vurdering må risiko i omstillingsprogrammet reduserast og vi må jobbe med korleis vi sikrar gjennomføring fram mot revidert økonomiplan i juni 2025.