Bustad og fritidsbustad 

Du må søke når du: 

• skal etablere eit nytt utslepp av vatn og avløp
• vil auke eit eksisterande utslepp 
• endring av anlegget

Søknad om utsleppsløyve må vere godkjent før byggesøknaden din kan handsamast 

Skal du byggje ny bustad eller fritidsbustad i område der det ikkje er mogleg å kople til kommunalt avløpsnett, må du som regel søke. 

I område der det er vanskeleg tilkomst for slamtømming (til dømes for tømmebil eller båt), kan det vere aktuelt med alternative løysingar, som forbrenningstoalett eller andre løysingar utan slamavskiljar.

Næringsbygg og andre bygg 

Du må søke når du:

• etablere eit nytt utslepp av vatn og avløp
• etablere eit nytt utslepp eller påslipp av oljehaldig avløpsvatn
• etablere eit utslepp eller påslipp av feitthaldig avløpsvatn, feittavskiljar
• auke eit eksisterande utslepp

Søknad må vere godkjent før byggesøknaden din kan handsamast 

For å etablere privat avløpsanlegg må du nytte eit ansvarleg føretak. Føretaket sender søknad på dine vegner og har ansvar for både prosjektering og utføring.

Føretaket må ha nødvendig kompetanse og ansvarsrett etter plan- og bygningslova § 20-3. Som hovudregel kan du ikkje søkje sjølv. 

Ved søknad om utsleppsløyve må det søkjast etter både forureiningsforskrifta kapittel 12 og plan- og bygningslova § 20-3.

Gå til søknadsskjema om utslepp av sanitært og kommunalt avløpsvatn frå hus og hytter

Søknaden må vere komplett før kommunen kan behandle saka.

Vanlegvis må den innehalde:

• Utfylt søknadsskjema 
• Situasjonsplan/kart som tydeleg viser plassering av avløpsanlegg og utslepp 
• Skildring av valgt avløpsløysing (type anlegg, dimensjonering og kapasitet i PE) 
• Dokumentasjon på reinseeffekt og at anlegget oppfyller gjeldande krav 
• Uttale eller dokumentasjon frå nøytral fagkyndig 
• Oversikt over naboar og andre berørte som er varsla, samt kopi av nabovarsel 
• Eventuelle merknader eller klager som er mottekne 
• Løysing for slamtømming som oppfyller kommunen sine krav
• Serviceavtale med minirenseanlegg

Ved infiltrasjon i stadlege massar skal søknaden i tillegg innehalde

• dokumentasjon på grunnforhold
• vurdering av eignaheit
• oppbygging av anlegget
• kart som viser plassering
• avstand til vasskjelder og sårbare område

Søk om utsleppsløyve via e-skjema her

Du kan kontakte oss via e-post på post@kinn.kommune.no.

Behandlingstid

Dersom du har levert ein komplett søknad, er kommunen si sakshandsamingsfrist normalt 6 veker. Dersom saka krev høyring eller ikkje er fullstendig, kan handsamingstida bli lengre. I periodar med stor saksmengde kan det også ta lengre tid før du får svar.

Gebyr

Det er gebyr for behandling av søknad om utsleppsløyve.
Det er også årleg gebyr for tilsyn og gebyr for slamtømming.

Sjå gjeldande satsar og avgifter i vår prisliste

Klage

Vedtak om utsleppsløyve kan påklagast av ein part eller ein annan med rettsleg klageinteresse i saka, jf. § 28 i forvaltningslova. Klagen må sendast til Kinn kommune seinast tre veker etter at vedtaket er motteke, eller klagar på annan måte er blitt gjort kjend med innhaldet.

Klagen kan sendast via elektronisk skjema, til post@kinn.kommune.no eller til Kinn kommune, Postboks 294, 6701 Måløy.

Kommunen vil handsame klagen. Dersom kommunen fastheld sitt vedtak, vil klagen, samt alle naudsynte saksdokument bli oversendt til Statsforvaltaren i Vestland for endeleg handsaming. Der ei klage fører fram, kan klagar etter tilhøva ha krav på å få dekka sine kostnadar med å setje fram klagen, jf. forvaltningslova § 36.

Sanitært avløpsvatn, gråvatn, oljehaldig og feitthaldig avløpsvatn

Avløpsvatn
Avløpsvatn omfattar både sanitært og industrielt avløpsvatn, samt overvatn.

Sanitært avløpsvatn
Dette er avløpsvatn frå hushaldning og menneskeleg aktivitet, til dømes frå toalett, kjøkken, bad og vaskerom.

Gråvatn
Er avløpsvatn frå kjøkken, bad og vaskerom. Avløp frå toalett (klosett) er ikkje inkludert. Gråvatn (frå dusj, vask og oppvask) inneheld framleis forureiningar som såpe, feitt, bakteriar og næringsstoff. Difor blir det rekna som avløpsvatn etter regelverket, sjølv om det ikkje kjem frå toalett.

Det betyr i praksis:

• Du må søkje om utsleppsløyve frå kommunen før du etablerer eller endrar eit gråvassanlegg 
• Kravet gjeld både for bustad og fritidsbustad 
• Også små anlegg for gråvatn aleine er søknadspliktige

Oljehaldig avløpsvatn
Dette er avløpsvatn som inneheld olje eller oljeprodukt, til dømes motorolje, bensin eller parafin. Det kan også vere spillvatn frå vask og avfetting av køyretøy.

Feitthaldig avløpsvatn
Dette er avløpsvatn som inneheld feitt frå animalsk eller vegetabilsk opphav. Typiske kjelder er verksemder som kafe, restaurant, bakeri, kantine, kiosk, bensinstasjon, sjukeheim eller liknande.

PE (personekvivalent)

PE (personekvivalent) er eit mål på kor mykje organisk stoff som blir tilført eit avløpsanlegg. Éin PE tilsvarer den mengda organisk stoff som gir eit biokjemisk oksygenforbruk (BOF5) på 60 gram oksygen per døgn.

Storleiken på avløpsanlegget blir rekna ut frå den største belastninga gjennom året. Det vil seie den høgaste mengda avløpsvatn som går til anlegget i løpet av ei veke, med unntak av uvanlege forhold, som til dømes kraftig nedbør.

For utslepp frå avløpsanlegg mindre enn 50 PE gjeld reglane i kapittel 12 i forureiningsforskrifta.

Du som eig eller er ansvarleg for anlegget, må kunne dokumentere kor stort anlegget er (i PE), og kva reinsekrav som gjeld.

Nøytral fagkyndig

Ein nøytral fagkyndig er ein person eller eit firma med relevant kompetanse innan avløpsløysingar. Dette kan til dømes vere ein røyrleggar med erfaring frå avløpsanlegg eller ein hydrolog.

Ein nøytral fagkyndig kan hjelpe deg med:
• dokumentasjon av reinsegrad
• utforming og dimensjonering av anlegget
• planlegging og eventuell installasjon

Dokumentasjon av reinsegrad for avløpsanlegg skal vere utført av nøytral fagkyndig.

Ønsker du å vite meir?

Ønsker du å vite meir om private avløpsanlegg og utsleppsløyve, kan du gå vidare på lenkene i dei ulike kulepunkta under: 

• Norsk vann sin rapport 257/2020 - Etablering og drift av mindre avløpsanlegg - rettleiar for huseigar, føretak og kommune (PDF, 8 MB)
• Norsk vann si heimeside
• NIBIO, Norsk institutt for bioøkonomi si heimeside

Regleverk

• Forurensningsforskriften, lovdata
• Vass- og avløpsanleggslova