Kinn kommune har ansvar for å oppfylle retten til barnehageplass for barn under opplæringspliktig alder som er busett i kommunen.

Kommunen oppfyller retten til barnehageplass på følgjande måte:

1. Barnet får oppfylt første ønsket sitt om barnehageplass
2. Barnet får oppfylt andre ønsket sitt om barnehageplass
3. Barnet får tilbod om ein annan barnehage, men som likevel er i samsvar med barnehagelova §§ 16, 17 og 18 om retten til barnehageplass

Barn som fyller 1 år innan november det året det vert søkt om plass, har rett til plass den månaden barnet fyller 1 år. 

Det er ein føresetnad at

• Det er søkt om barnehageplass i samband med hovudinntaket
• Barnet er busett (er folkeregistrert) i kommunen det året det vert søkt om barnehageplass

Opptaksprosessen er samordna for alle godkjende barnehagar i kommunen, i samsvar med barnehagelova § 17.

Det vert gjennomført eitt hovudinntak til ledige barnehageplassar kvart år, og søknadsfristen er fastsett til 15. februar.  Søknadsfristen vert kunngjort i lokalaviser og på kommunen si heimeside.

Barnehageplassane vert tildelt i samsvar med barnehagelova § 16 Rett til barnehageplass, § 18 Prioritet ved opptak,  Forskrift om saksbehandlingsreglar ved opptak i barnehage og Vedtekter for kommunale barnehagar i Kinn kommune §§ 6 og 7.

Forskrift om sakhandsamingsreglar ved opptak i barnehage §§ 4 og 5, gjev søkjar som ikkje har fått 1. eller 2. ønskje om barnehageplass oppfyllt, høve til å be om skriftleg utgreiing eller innsyn i dokument vedkommande saka.

Vi informerer uoppfordra om at dersom barn ikkje vert tildelt barnehageplass etter føresette sine 1. og 2. prioriteringar, har det ikkje vore fleire ledige barnehageplassar att i vedkommande barnehagar. Barn får då tildelt barnehageplass i ein annan barnehage  i opptaksområdet som har ledig plass.

Det er klagerett innan 3 veker etter at brevet om tildelt barnehageplass er mottatt, jf. Forskrift om sakshandsamingsreglar ved opptak i barnehage §§ 6 og 7.

Skrifleg klage skal sendast til: Kinn kommune, postboks 294, 6701 Måløy. 

Søkjer du om barnehageplass til andre tider enn til det årlege hovudinntaket, har ikkje barnet rett til barnehageplass før ved neste år hovudinntak. Dette kan gjelde dersom:

• Barn flyttar til kommunen etter tidspunkt for oppstart av nytt barnehageår i august
• Barn ikkje ønskjer plass ved første aktuelle hovudinntak
• Barn takkar nei til tildelt barnehageplass
• Barn seier opp barnehageplassen sin 

Barn det vert søkt om plass til utanom ordinært hovudinntak, vert sett på prioritert venteliste. Dersom det vert ledig plass i ein barnehage i løpet av barnehageåret, vert plassar tildelt etter ventelista.

Barn med nedsett funksjonsevne, og barn som har vedtak etter barnevernslova §5 -1 første ledd bokstav a til d, § 3-1 og § 3-4 første ledd bokstav b, har rett til prioritet ved opptak i barnehage. Dokumentasjon i form av sakkunnig vurdering og vedtak frå barnevernstenesta skal følgje søknad om barnehageplass (sjå også vedtekter for kommunale barnehagar i Kinn kommune § 6.1)

Barn med rett til prioritet ved opptak i barnehage, vil ha fortrinnsrett til barnehageplass i opptaksområdet uavhengig av hovudinntaket.

Tildeling av barnehageplassar vert gjort som einskildvedtak.