Spelemidlar er overskot frå Norsk Tipping som vert fordelt til ulike idrettslege formål.

Spelemidlar til anlegg for idrett og fysisk aktivitet er eit viktig verkemiddel for å nå staten sin overordna målsetting om å legge til rette for idrett og fysisk aktivitet for alle.  

Det finst to hovudgrupper av spelemiddeltilskot

Spelemidlar til ordinære anlegg og rehabilitering

Dette er anlegg for organisert aktivitet. Her kan det søkast om 1/3 av godkjent kostnad inntil ei viss grense. Det er ulike maksimumsbeløp på dei ulike anleggstypane.

Typiske ordinære anlegg er for eksempel idrettshallar, friidrettsanlegg, golfanlegg, klubbhus, kunstgrasbaner, skyttaranlegg, kiosk, lagerbygg og svømmeanlegg.  

Nærmiljøanlegg

Dette er utandørs anlegg for eigenorganisert aktivitet knytt til bu-/nærområde. Her kan det søkast om 50% av godkjend kostnad med eit maksimumstilskot på 300 000 kroner.

Typiske nærmiljøanlegg er fleirbruksanlegg (tilrettelagt for ballspel, hopp, løp, turn og så vidare), ballbinger/-flater, turløyper lengre enn 500 meter, skileikanlegg, trimparkar og hinderløyper. Det kan også søkast om lysanlegg i tilknyting til nærmiljøanlegg. 

Kva vert det ikkje gjeve tilskot til?

Det vert ikkje gjeve tilskot til drift/vedlikehald, leige, laust utstyr, kjøp av grunn, publikumstribuner, vegar/parkeringsplassar, beplantning, tilknytningsavgifter, flytting av kablar/ledningar/rørføringar, eigedomsgjerder eller reguleringsarbeid. 

Desse kan søke om spelemidlar til ordinære anlegg

• Kommunar
• Fylkeskommunar
• Kommunale og fylkeskommunale føretak
• Studentsamskipnadar
• Idrettslag og organisasjonsledd i Norges idrettsforbund og olympiske og paralympiske komité (Norges idrettsforbund) 
• Sammenslutningar organisert under Norges Jeger- og Fiskerforbund, Det Frivillige Skyttervesen og Norges Bilsportforbund 
• Aksjeselskap, samvirkeforetak, stiftingar og andre samanslutningar med vedtekter som oppfyller kriteria i pkt. 2.3.1.6 i bestemmelsane om spelemiddel

Desse kan søke om spelemidlar til friluftslivsanlegg

• Den Norske Turistforening (56 medlemsforeningar)
• Samanslutningar organisert under Friluftsrådenes Landsforbund, samt Oslofjordens Friluftsråd og Norsk Friluftsliv. Unntak er Norges Jeger- og Fiskerforbund (sjå punktet over) og Norsk Kennel Klub (sjå punktet under)

Desse kan søke om spelemidlar til hundesportanlegg

Norsk Kennel Klubb og aktivitetsklubbar organisert under klubben.

Desse kan søke om spelemidlar til sykkelanlegg

Norsk Organisasjon for Terrengsykling og sammenslutningar organisert under organisasjonen.

Desse kan søke om spelemidler til nærmiljøanlegg

Dette er anlegg berekna på eigenorganisert aktivitet, utandørs og tilknytta bu- og nærmiljø. Dei kan ikkje reserverast eller brukast til organisert aktivitet på fast basis.  

Desse kan søke om spelemidlar til nærmiljøanlegg:

• Alle som er kvalifisert under ordinære anlegg
• Burettslag, bygdelag og velforeiningar (ikke hyttevelforeiningar)

Det er berre eigaren av anlegget som kan søke om midlar. Ein kan ikkje søke på vegne av ein ikkje-søknadsberettiga organisasjon. 

Det er eit krav frå Kulturdepartementet at anlegg som det skal søkast spelemiddel til skal vere ein del av vedtatt kommunal plan som omfattar anlegg til idrett, fysisk aktivitet og friluftsliv. Innmeldte anlegg vil leggast inn i planen som vert handsama og prioritert av oppvekst- og kulturutvalet.

Frist for å melde inn nye anlegg det skal søkast spelemidlar til er 15. september.

Meld inn nye anlegg her

Etter innmelding vil vi kontakte deg, og de vil, når alle dokuement er på plass, motta anleggsnummer. Du kan då starte å førebu søknaden. Dette gjeld ikkje for søknadar som allereie er på prioriteringslista eller som skal fornyast eller gjentakast.

Søknadsfrister og informasjon

Frisen for å søke om spelemidlar er 1. oktober.  

Alle søknader for spelemidlar skjer elektronisk via nettsida Anleggsregisteret.no

På nettsida til Anleggsregisteret finn du også alt du treng å vite om søknadsprosessen.

For å kunne levere ein best mogleg søknad kan du kontakte kommunen. Då får du rettleiing og råd i søknadsprosessen. Ansvarleg for spelemidlar i Kinn kommune er Sander Ødelien, e-post: sander.odelien@kinn.kommune.no (sør) og Ronny Silden Totland, e-post: ronny.totland@kinn.kommune.no (nord).

Tips til arbeidet med søknad

• Søknad om spelemidlar er omfattande og krev mykje dokumentasjon. Sett derfor opp ein tidsplan for arbeidet og sørg for avklarande styrevedtak for gjennomføring av prosjektet.
• Grunneigarforhold må være avklart.
• Avklar med plan- og bygningsavdelinga i kommunen om tiltaket krev ulike løyver.
• Hald orden på prosjektrekneskapet frå første dag.

Kommunen sin frist for å sende inn spelemiddelsøknad er 15. januar, og kulturdepartementet fastset rammene til fordeling første del av av mai. Fylkeskommunen fordeler dei tildelte beløpa og informerer søkar om resultatet innan 15. juni.

Ordinære anlegg

Søkar må ha rett til bruk av grunn der anlegget ligg eller skal ligge og skal ha grunnlag i eit av følgande krav:

• Eigedomsretten skal være tinglyst.
• Tinglyst feste-/leigerett på minimum 30 år.
• Avtale på minimum 30 år ved anlegg på eigendom eigd av kommune, fylkeskommune eller stat.

Anlegget skal vere del av vedtatt kommunal plan som omfattar idrett og fysisk aktivitet. Unntak gjeld for orienteringskart og skilting eller merking av eksisterande turveg/-sti og skiløyper.

Prosjektet må vere fullfinansiert. Det vert tildelt inntil 1/3 (en tredjedel) av godkjend kostnad, så lenge det ikkje overskrid maksimal sats for enkelte anlegg. For friluftslivsanlegg er satsen 50 % av godkjent kostnad som vert tildelt så lenge summen ikkje er over maksimal sats for friluftsanlegg.

Ved rehabilitering av anlegg skal det ha gått 20 år. Det vert gjeve midlar til enkelte rehabiliteringar når det har gått 10 år som til dømes ved byte av idrettsgolv og -dekke.

Nærmiljøanlegg

Det er ein føresetnad at eit nærmiljøanlegg skal være ålment tilgjengeleg for fysisk aktivitet og idrett, og dermed ikkje brukast til organisert aktivitet på fast basis.  

Bestemmelsane for nærmiljøanlegg er lik dei for ordinære anlegg med følgande unntak:

• Søkaren må ha rett til bruk av grunn med minimum 10 års varigheit.
• Det vert ikkje gjeve midlar til rehabilitering, ombygging eller tilpassing før etter 10 års bruk.
• Bestemmelsen om omtale i den kommunale planen gjeld ikkje nærmiljøanlegg.
• Det omfattar ikkje tilskot til kjøp og innreiing av anlegg eller til endring av eldre anlegg for universell utforming.
• Det er ikkje krav om tilstandsrapport ved rehabilitering.

Ein søknadsberettiga kan motta inntil 50 % av dei godkjende kostnadane, og er avgrensa til 300 000 kroner, med unntak. Eit tillegg på 30 % kan verte gjeve til område med særskilte levekårsutfordringar.