Komfyren er heimen si største brannkilde, og dei fleste komfyrbrannar skyldast at ein er uoppmerksam og ikkje tekniske feil ved produktet. Ei komfyrvakt kan redde heimen din frå å gå opp i røyk.
Dei fleste komfyrbrannar skjer på dagtid og rammar eldre mennesker, men det er brannar som startar om natta som tek flest liv. Då er det gjerne yngre menneske som blir ramma. Rus og alkohol er ofte ein medverkande årsak til at ein gløymer eller sovnar frå komfyren.
Det er krav til komfyrvakt i alle nye bustadar, også om det leggast opp ny kurs til komfyren. Dei same reglane gjeld for fritidsbustader. Det betyr at komfyrvakta skal vere installert som ein del av det faste elektriske anlegget. Kravet kom i 2010. Om kjøkkenet ditt er eldre enn dette bør du ettermontere komfyrvakt.
Gasskomfyrar i dag har krav om flammevakt, som gjør at gassen stengast om flammen slokna. Det er ikkje krav til komfyrvakt på same måte som på elektriske komfyrar.
Komfyrvakta består av ein sensor og ein straumavbryter, som anten er plassert bak komfyren eller i sikringsskapet. Sensoren overvaka kokeplatene. Om sensoren oppdagar fare for brann, utløyser den ein alarm. Om ingen reagerer på denne, gir sensoren beskjed til ein bryter om å kutte straumen til komfyren.
For å sikre kvaliteten på komfyrvakta er det laga ein felles, internasjonal norm som stiller ei rekke krav til komfyrvaktene. Normen heiter NEK EN 50615. Sjekk merkinga på produktet eller spør i butikken om komfyrvakta du skal kjøpe er testa etter krava i norma. Aller helst skal den også vere FG-godkjent.
Ei komfyrvakt som skal pluggast i stikkontakt kan du montere sjølv.
Komfyrvakter for fast tilkopling må monterast av ein elektrikar. Fast montering er krav ved nyinstallasjonar og oppussing av kjøkken (dersom det leggast opp ny kurs til platetopp/komfyr).
Komfyrvakter får du kjøpt i dei fleste elektronikkbutikkar, i ei rekke kjøkkenbutikkar og nettbutikkar, og i forsikringsselskapa sine nettbutikkar. Komfyrvakter for fast montering kjøpast ofte av elektrikaren, i samband med monteringsjobben. Hugs å be om dokumentasjon på at produktet oppfyller krava i norma.
For spesielt sårbare personar kan hjelpemiddelsentralen installere komfyrvakt gratis. Sjekk hos din lokale hjelpemiddelsentral kva for vilkår som gjeld. Kommunale ergoterapeutar eller heimesjukepleiarar kan hjelpe til med søknad. Om du får tilbod om komfyrvakt, be om ei vakt som oppfyller krava i norma.
Publisert 23.11.2020 11.24
Sist endra 28.04.2023 09.01