3. Openheit og innsyn
Kinn kommune skal legge til rette for mest mogeleg innsyn og deltaking i den politiske og administrative handsaminga av saker. Dette tyder:
- Alle møter i folkevalde organ er opne og skal gjerast kjende på kommunen si nettside i god tid i førevegen
- Ved fysiske møter skal det sikrast tilkomst og eit tilstrekkeleg tal stolar for publikum
- Alle møter i folkevalde organ skal overførast digitalt (strøymast) og lenke til overføringa skal vere tilgjengeleg før og under møtet på kommunen si nettside
- Opptak av kommunestyre- og formannskapsmøter vert lagra og gjort tilgjengeleg for alle på kommunen si nettside.
- Kinn kommune skal praktisere meirinnsyn jamfør offentleglova §11: Når det er høve til å gjere unntak frå innsyn, skal organet likevel vurdere å gi heilt eller delvis innsyn. Organet bør gi innsyn dersom omsynet til offentleg innsyn veg tyngre enn behovet for unntak..
- Eit folkevald organ kan vedta at ei sak skal vere lukka (unntatt offentlegheit). Det skal i slike tilfelle synast til lovheimel for slik lukking. Debatt om slik lukking føregår normalt ope, men kan lukkast i særskilde høve jamfør kommunelova §11-5. Røysting om lukking av sak skal skje i open røysting. Dersom organet handsamar ein tilsett sine tenestelege vilkår (personalsak) skal saka lukkast. Det same gjeld dersom det er teiepliktige opplysningar som skal handsamast.
- Saker som vert lukka etter §11-5, andre ledd i kommunelova kan ikkje handsamast i fjernmøter (digitale møter) jamfør kommunelova §11-7.
- Medlemer av kommunestyret har rett til opplysningar frå administrasjonen om saker som vert handsama i eit politisk organ. Administrasjonen skal svare på slike førespurnader utan opphald