Malisa har jobba med digital marknadsføring, som frivilligkoordinator stasjonert i fleire land, har vore i vikariat i Kulturtenesta med arrangement og involvering av frivillige, økonomiansvar og innføring av nye system. I dag er ho spesialkonsulent på Florø ungdomsskule med oppgåver m.a. knytt til vikarhandtering og kommunikasjon. Ho er og har vore aktiv på fritida i eit breitt spekter av organisasjonar. I fagkretsen har Malisa økonomi, statsvitenskap, psykologi og kulturfag.

Som kulturhusleiar blir Malisa avdelingsleiar for kulturhusa i Florø og Måløy, og vil få det daglege ansvaret for drift og utvikling. Dette inneber m.a. utleige/utlån av lokaler, programmering av forestillingar, kontraktsforhandlingar med leigetakarar, tilrettelegging for arrangørar/kulturlivet, økonomistyring og det daglege personalansvaret. Til avdelinga ligg også oppfølging av spelemiddelsøknader, organisering av brukarmøter og ulike administrative oppgåver.

Arbeidsområdet er del av Kulturtenesta med kultursjefen som nærmaste overordna, og kulturhusleiar er sidestilt med andre avdelingsleiarar. Kulturtenesta har varierte arbeidsoppgåver og mange spennande faglege utfordringar. Godt samarbeid og kunnskapsdeling på tvers av fagområde står sentralt i det daglege arbeidet. 

Vi har ansvar for forutan kulturhusa/kinoane også ansvar for fagområde som bibliotek, ungdomsklubbar, frivilligsentralar, utlånssentralar av idretts- og friluftsutstyr, Den kulturelle spaserstokken og - skulesekken, namnesaker, tilskotsordningar, kulturarv, investeringsprosjekt. Vi samarbeider breitt med andre kommunale tenester, andre offentlege instansar, frivillige lag og organisasjonar, det frie kunstfeltet, profesjonelle kulturinstitusjonar, kulturnæringsaktørar og tilgrensande fagfelt.  Per i dag er vi rundt 16 årsverk og 30 tilsette fordelt på Florø og Måløy. 

Vi er svært glade for at Malisa har valt å kome tilbake til oss i kulturtenesta!