Korleis kan vi utvikle gode bustader og lokalsamfunn som gjer det mogleg å bu trygt heime – lenger og betre? Det er eit av hovudspørsmåla på konferansen, som blir arrangert av Husbanken vest og Statsforvaltaren i Vestland.

For Kinn er dette tett knytt til arbeidet med Bustad i sentrum. Kommunen ønskjer å legge til rette for attraktive og funksjonelle bustader og bumiljø for både eldre, unge og førstegangsetablerarar i sentrumsområde. Samtidig kan fleire tilpassa bustader i sentrum bidra til utvikling og aktivitet i Florø og Måløy. Dette er arbeid som er tett kopla mot kommuneplanen sin samfunnsdel og den statlege reforma "Bu trygt heime". Prosjektet har blitt presentert for formannskapet og kommunestyret tidlegare i år.

På konferansen får kommunen høyre om erfaringar frå andre kommunar, ulike buformer, aldersvenleg planlegging og økonomiske verkemiddel frå Husbanken.

– Husbanken sine verkemiddel kan bli svært viktige for å få til bustadutvikling som møter behova våre framover. Samtidig er det nyttig å lære av kommunar som allereie har prøvd ut nye løysingar, seier kommunalsjef Rolf Bjarne Sund.

Målet er å ta med konkrete idear og kunnskap heim til det vidare arbeidet med Bustad i sentrum.